O‘zbekiston futzal federasiyasi prezidenti Bekzod Mamatqulov kecha Varshava shahrida Polsha futbol federasiyasi vise-prezidenti Adam Kazmerchyak bilan uchrashdi.
O‘zbekistonning Polshadagi favqulodda va muxtor elchisi Amirsaid A’zamxo‘jayev hamrohlik qilgan uchrashuv davomida har ikki mamlakat futboli va futzali rahbarlari O‘zbekiston futbol assosiasiyasi hamda mamlakatimiz futzal federasiyasi va Polsha futbol federasiyasi o‘rtasida do‘stona aloqalarni o‘rnatish, ko‘plab yo‘nalishlar bo‘yicha hamkorlikni yo‘lga qo‘yish borasida kelishib olishdi.
Shuningdek, Bekzod Mamatqulov va Adam Kazmerchyak har ikki mamlakat U-18 va U-20 yosh toifasidagi terma jamoalarni hamda O‘zbekistonda ayollar futzalini rivojlantirish bo‘yicha samarali hamkorlik qilish borasida kelishib olishdi. Jumladan, kuz faslida O‘zbekiston va Polshaning ham erkaklar, ham ayollar terma jamoalari ishtirokida o‘rtoqlik uchrashuvlari tashkil etish borasida qaror qabul qilindi.
Uchrashuv so‘ngida Adam Kazmerchyak mehmonlarga jahon futboli yulduzi, Polsha milliy terma jamoasi sardori Robert Levandovskiyning dastxati tushirilgan maxsus futbolkani taqdim etdi.













