Braziliyalik himoyachi Danilo vataniga qaytdi va "Flamengo" futbolchisiga aylandi.
Braziliyalik jurnalistlarga bergan ilk intervyusida u Turinning "Yuventus" klubini tark etishiga turtki bo‘lgan sabablarni tushuntirdi.
"Yuventus" mening faoliyatimdagi eng muhim klub bo‘lsa kerak. Muxlislar, futbolchilar bilan yaxshi munosabatda bo‘ldim, bu shaharda o‘zimni ajoyib his qildim, lekin oxirgi paytlarda bu mening oilam degan tuyg‘u biroz so‘ndi.
So‘nggi 6 oy ichida klubda o‘zgarishlar bo‘ldi, men ularni salbiy deb topdim. Shunga qaramay, men “Yuventus”ni qo‘llab-quvvatlashda davom etaman", dedi futbolchi.













