Yakshanba kuni "Humo Arena"da muxlislar va jurnalistlar uchun «Humo» jamoasining ochiq mashg‘uloti bo‘lib o‘tdi. Bu safar an’anaviy tadbir jamoaning pley-off bosqichiga tayyorgarligiga bag‘ishlandi.

Ochiq mashg‘ulot muxlislar orasida katta qiziqish uyg‘otdi. Axir xokkey ishqibozlari yana qachon sevimli jamoasining mashg‘ulot jarayonini tomosha qilish, o‘yinlarga tayyorgarlik mashqlarini ko‘rish imkoniyatiga ega bo‘lishardi.

Bundan tashqari, «Humo» xokkey klubi tashkilotchilari sodiq muxlislarga o‘z sevimli o‘yinchilari bilan yanada yaqinroq tanishish imkoniyatini taqdim etishdi. Mashg‘ulotdan so‘ng barcha xohlovchilar avtograf olib, xokkeychilar bilan suratga tushishdi.

Umid qilamizki, bugungi tadbirdan olingan yaxshi kayfiyat jamoamizning mehnat kunlarini yanada yorqin qiladi va oldinda turgan shiddatli bahslarda ilhom bag‘ishlaydi. Bugun biz bilan bo‘lgan barchaga tashakkur!

Pley-offning dastlabki uchrashuvlariga oz vaqt qoldi. Rudniy shahrining «Gornyak» klubiga qarshi chorak final seriyasining ilk ikki o‘yiniga chiptalar allaqachon ITicket.uz saytida sotuvda. Uchrashuvlar 18 va 20 fevral kunlari, soat 19:30 da Humo Arenada bo‘lib o‘tadi.