Germaniyaning Vayssenxaus shahrida "2025 Freestyle Chess Grand Slam" musobaqasida hal qiluvchi pallaga kirdi.

Javohir Sindarov bugun yarim finalning ilk bahsini o‘tkazgan bo‘lsa, Nodirbek Abdusattorov 5-8-o‘rinlar uchun o‘yinlarga kirishdi.

Sindarov jahonning uchinchi raqamli shaxmatchisi Fabiano Karuanaga qarshi qora donalarda o‘ynadi. Shaxmatchilar butun o‘yin davomida yuqori aniqlik namoyish etishdi va o‘yin oxiriga qadar tenglik saqlanib turdi. 46-yurishda esa AQSHlik shaxmatchi piyoda bilan juda noaniq yurishni amalga oshirdi. Ammo hamyurtimiz o‘yinni g‘alabaga olib boruvchi yo‘lni topa olmadi. Bunga esa, albatta, vaqt kamligi sabab bo‘lgan bo‘lishi mumkin. Natijada tomonlar durangga imzo chekishdi. Javohir ertaga oq donalarda o‘ynaydi.

Nodirbek Abdusattorov bugun fransiyalik Alirizo Firuzjaga qarshi oq donalarda o‘ynadi. 15-yurishga kelib kompyuter o‘zbekistonlik sportchining g‘alaba qozonish imkoniyatini yuqori baholayotgan edi. Ammo bir nechta noaniq yurishlar tufayli 25-yurishga kelib vaziyat tenglashib qoldi. 43-yurishga kelib tomonlar durangga imzo chekishdi. Grossmeyterlar o‘rtasida ertaga javob o‘yini o‘tkaziladi.

Darvoqe, yarim finalning ikkinchi o‘yinida Vinsent Keymer, kutilmaganda, Magnus Karlsenni mag‘lubiyatga uchratdi.

Eslatib o‘tamiz, musobaqaning mukofot jamg‘armasi — 750.000 dollarga teng. G‘olib shaxmatchiga 200.000 dollar beriladi.