Germaniya terma jamoasining sobiq darvozaboni Oliver Kan hamon "Bordo" futbol klubini sotib olish istagida, deb xabar beradi RMC Sport. Bir necha hafta oldin boshlangan muzokaralar turli darajalarda davom etmoqda.
Shuningdek, 55 yoshli germaniyalik futbolchi stadionni boshqarish masalalari bo‘yicha shahar ma’muriyati va tijoriy sud bilan bog‘lanib, klubning moliyaviy holatini o‘rgangan. Yaqin haftalarda taqdim etiladigan "Bordo" qarzini restrukturizasiya qilish rejasi sotuv jarayonini ilgari surishda muhim ahamiyatga ega bo‘ladi.
Myunxenning "Bavariya" klubi sobiq darvozaboniga fransuz futboliga sarmoya kiritish istagida "Marsel"ning sobiq prezidenti Jak-Anri Eyro yordam bermoqda.
O‘tgan yilning yozida "Bordo" moliyaviy muammolar tufayli mamlakatning 4-divizioniga tushirilgandi. 18-turdan so‘ng jamoa turnir jadvalida 1-o‘rinni egallab turibdi va yuqori darajaga ko‘tarilish uchun kurashmoqda.
