Brayan Saragosa "Real" singari jamoalarga qarshi o‘ynashni yoqtirishini aytdi.

"Osasuna" La Liganing 24-turi doirasida shanba kuni madridliklarni qabul qiladi.

"Hamma jahon darajasidagi futbolchilarga qarshi o‘ynashni istaydi, bu barchaga manzur keladi. Men ular bilan o‘ynashni yaxshi ko‘raman, biz doimo ularga havas bilan qaraymiz, chunki ular eng zo‘rlari.

"Real"da ajoyib o‘yinchilar ko‘p, ammo hozirgi kunda Vinisiusni namuna qilib ko‘rsatgan bo‘lardim. Uning o‘yin uslubi menga yoqadi, undan o‘rnak olaman. Men undan nimadir o‘rganishga harakat qilaman - men unga o‘xshamasam-da, mening o‘yinim ko‘p jihatdan Vinisius qiladigan ishlariga asoslangan.

Mbappe haqida ham shunday deyishim mumkin, bu ikkisi buyuk futbolchilar, garchi o‘yin uslubim bo‘yicha ko‘proq Vinisiusga o‘xshash bo‘lsam-da," - deya ta’kidladi "Osasuna" vingeri.