O‘zbekiston Superligasining 20-turidan o‘rin olgan markaziy uchrashuvda "Nasaf" o‘z maydonida "Neftchi"ni yirik hisobda mag‘lub etdi — 6:2.
Qarshidagi "Markaziy" stadionida mezbonlar uchrashuvni juda shiddatli boshladi. 6-daqiqada Umarbek Eshmurodov hisobni ochgan bo‘lsa, oradan ikki daqiqa o‘tib Bobir Abdixoliqov Sharof Muhitdinovning uzatmasini golga aylantirdi.
22-daqiqada Sharof Muhitdinovning o‘zi ham raqib darvozasini ishg‘ol qildi. 40-daqiqada esa Adenis Shala hisobni 4:0 ko‘rinishiga keltirdi. Shu tariqa, "Nasaf" birinchi bo‘limning o‘zida to‘rtta javobsiz gol urdi.
Ikkinchi bo‘lim boshida Bobir Abdixoliqov dublni rasmiylashtirdi. 58-daqiqada zaxiradan maydonga tushgan Alisher Odilov "Neftchi"ning birinchi javob golini urdi. Biroq 80-daqiqada Alibek Davronov mezbonlarning oltinchi goliga mualliflik qildi.
Uchrashuvning 89-daqiqasida Stipe Perisa Alisher Odilovning uzatmasidan keyin yana bir to‘p kiritdi va yakuniy hisobni belgiladi — 6:2.
Shu tariqa, Ro‘ziqul Berdiyev shogirdlari Superliga peshqadami "Neftchi" ustidan mavsumdagi eng yorqin g‘alabalaridan birini qo‘lga kiritdi.
