Xarbin-2025 qishki Osiyo o‘yinlari nihoyasiga yetdi. Ushbu musobaqada ishtirok etgan o‘zbekistonliklar yakunda medallar jamg‘arish bo‘yicha kuchli beshlikdan o‘rin oldi.
Oxirgi kungi bellashuvlarda o‘zbekistonlik figurali uchish bo‘yicha sportchilar Niginabonu Jamoliddinova hamda Sevinch Rahimova muzga chiqdi. Yakunda Jamoliddinova 17, Rahimova esa 22-pog‘onani egalladi.
Shunday qilib, 1 ta oltin medalga ega O‘zbekiston jamoasi musobaqalarni umumjamoa hisobida Filippin bilan birgalikda 5-o‘rinda yakunladi. 83 ta medalga ega chiqqan mezbon Xitoy umumjamoa hisobida 1-o‘rinni egalladi. Kuchli uchlikdan Janubiy Koreya va Yaponiya jamoalari o‘rin oldi.
Qo‘shni Qozog‘iston delegasiyasi 18 ta medal jamg‘arib jadvalda to‘rtinchi bo‘ldi.
Avvalroq O‘zbekiston Prezidenti Shavkat Mirziyoyev qishki Osiyo o‘yinlarida O‘zbekiston sportchilari so‘nggi 26 yilda ilk bor figurali uchish bo‘yicha juftliklar orasida oltin medalni qo‘lga kiritgani bilan tabriklagandi.
