23 may kuni Xulen Lopetegi "Vest Xem" bilan shartnoma imzoladi. Ertasi kuni Paulo Fonseka “Milan”ni boshqardi. Biroq 30 dekabr kuni portugaliyalik ishdan bo‘shatildi, bir hafta o‘tib esa ispaniyalik ham xuddi shunday taqdirga duch keldi.
Vaholanki, dastlab Lopetegi “rossoneri” murabbiyligiga asosiy da’vogar edi. Biroq ishqibozlar aralashib, klub rahbariyati yo‘nalishini o‘zgartirdi. Murabbiy La Gazzetta dello Sport nashriga bergan intervyusida "Milan" bilan muzokaralar haqida gapirdi.
"Milan" menga taklif bilan chiqqanida xursand bo‘ldim. Boy tarixga ega bo‘lgan katta klub va A Seriya jamoaviy yondashuvi bilan meni maftun etib kelgan. Arrigo Sakki o‘yin haqidagi tasavvurimga ta’sir qildi, uning taktikasini o‘rgandim va hatto u bilan tanishdim. Muzokaralar yaxshi ketayotgandi, lekin birdan ular to‘xtab qolishdi", - deydi Lopetegi.
