Superliga yangi mavsumiga tayyorgarlik bosqichining so‘nggi qismini Dubayda o‘tkazgan «Dinamo» jamoasi 12 kunlik o‘quv-mashg‘ulot yig‘ini doirasida to‘rtta kuchli sparring raqibga qarshi maydonga tushdi.

Vadim Abramov murabbiyligidagi jamoamiz dastlab Armaniston chempioni «Urartu»ga qarshi maydonga tushgan bo‘lsa, ikkinchi o‘yinda Rossiyaning uch karra chempioni «Lokomotiv»ga qarshi o‘ynadi. Uchinchi bahsda Qozog‘istonning uch karra chempioni, UYEFA Konferensiyalar ligasi ishtirokchisi «Astana»ga qarshi saf tortilgan bo‘lsa, so‘nggi o‘yinda Valeriy Karpin murabbiyligidagi «Rostov» klubi bilan uchrashuv o‘tkazildi.

Qayd etish joiz, Dubaydagi o‘rtoqlik o‘yinlarida natija emas, aynan kuchli raqiblarga qarshi sinov o‘yinlari o‘tkazish maqsad qilingandi. Jamoamizning Dubaydagi mashg‘ulotlari 24 fevralga qadar davom etib, shu kuni «Dinamo» O‘zbekistonga qaytadi. Superliga startidan oldingi yakuniy mashg‘ulotlar Toshkentda davom ettirilishi rejalashtirilgan.