O‘zbekiston kubogi guruh bosqichiga qur’a tashlangach, «Dinamo» matbuot xizmati jamoa bosh murabbiyi Vadim Abramovning qur’a va raqiblar haqidagi fikri bilan qiziqdi.

«Odatdagidek, kuchli guruhlardan biriga tushdik. Qiziqarli o‘yinlar bo‘ladi. Pley-offga chiqish uchun kurashamiz. Qizig‘i, o‘tgan mavsumdagidek kuchli raqiblar yig‘ildi. «Andijon» kubokning amaldagi g‘olibi, «Surxon» yarimfinal ishtirokchisi. «Andijon» bilan o‘tgan yil ham bir guruhda edik va Andijonda 2:2 o‘ynagandik. Bu safar yana Andijonga boramiz. O‘z o‘yinimizni ko‘rsatishimiz va kurashish kerak. Muxlislarni qiziqarli o‘yinlar kutib turibdi», - deydi Vadim Karlenovich.

Ma’lumot uchun, «Dinamo» kubok 1-turini 8 yoki 9 aprel kuni Samarqandda boshlasa, 22 yoki 23 aprel kuni Termizga safar qiladi, 13 yoki 14 may kuni esa Andijonga safar qiladi.