"Roma" markaziy himoyachisi Mats Xummels Italiyaga darhol moslasha olmaganini tan oldi.
36 yoshli futbolchi butun faoliyati davomida o‘z vatanida to‘p tepib, "Bavariya" va "Borussiya" Dortmund sharafini himoya qilgan. Germaniyalik futbolchi o‘tgan yilning sentyabr oyida erkin agent sifatida "Roma"ga ko‘chib o‘tgan edi. Tajribali markaziy himoyachi uzoq vaqt davomida "bo‘rilar" tarkibiga kira olmadi, ammo uning muammolari birgina futbol bilan cheklanib qolmagandi.
"Avvaliga qiyinchiliklarga duch keldim. Rim juda katta shahar, juda chiroyli, ajoyib tarixga ega. Ammo mahalliy yo‘l harakati qoidalariga ko‘nikishim uchun vaqt kerak bo‘ldi. Dastlabki oylar haqiqatan ham og‘ir o‘tdi. Yaqinda menga allaqachon rimlik sifatida mashina haydayotganimni aytishdi, ammo bu maqtov emas, balki yashirin haqorat bo‘lishi mumkin, deb o‘ylayman," - deya Xummelsning so‘zlarini keltiradi Football Italia.
