7 mart sanasida «Mavsum-2025» rasman start oladi. Yaxshi bilasiz, Superliganing ilk turini "Andijon" 8 mart kuni Qo‘qonda «Qo‘qon-1912»ga qarshi o‘yin bilan boshlaydi.

Andijonlik muxlislar ham bo‘lajak bellashuvni katta qiziqish bilan kutishayotgani sir emas. Chunki ular katta futbolni sog‘inishgan. «Andijon» esa yana yangi sarguzashtlarga hozirlik ko‘ryapti.

Jamoadagi har bir futbolchi yangi mavsum boshlanishini va xususan «Qo‘qon-1912» klubiga qarshi bellashuvni kutmoqdalar.

«Andijon»ning ajoyib futbolchilaridan biri, yarim himoyachi Muhammadkarim Toirov ham jamoa bilan birga mashg‘ulotlarda bor kuch hamda imkoniyatini ishga solyapti va o‘zini nafaqat ilk uchrashuvga, balki butun boshli mavsumga tayyorlab boryapti.

Toirov bo‘lajak uchrashuv oldidan o‘zini qanday his qilayotgani xususida gapirdi:

“Avvalo, barcha yurtdoshlarimizga va shu jumladan andijonliklarga kirib kelgan Ramazon oyi muborak bo‘lsin. Chempionatga kelsak, ilk uchrashuvini intiqlik bilan kutyapmiz. Biz jamoamiz bilan jangga tayyormiz”.

Bu yildan Superligada vodiy derbilari yana bittaga ko‘paydi. Elitaga qaytgan «Qo‘qon-1912» bu borada «Andijon»ning chempionatdagi ilk raqibiga aylanishi va ilk turdayoq mazkur juftlik fonida muxlislarga derbi taqdim etishi shubhasiz. Muhammadkarim Toirov esa jamoamizning 1-turdagi raqib haqida shunday dedi:

“Raqibimizga keladigan bo‘lsak, ular ham chempionatga yaxshi tayyorlanishgan. Albatta, raqibni hurmat qilgan holda maydonga tushamiz. Bizni oldimizda katta maqsadlar turibdi. Bu derbida g‘alaba qozonishimiz shart. Xudo xohlasa, shunday ham bo‘ladi. Men jamoamga ishonaman!”.

Ta’kidlab o‘tganimizdek, andijonlik muxlislar ham bo‘lajak bellashuvni katta qiziqish bilan kutmoqdalar. 8 mart oqshomida shubhasiz «Andijon» fan-klubi Qo‘qondagi stadionda jamoamizni yuqori darajada qo‘llab-quvvatlashiga shubha yo‘q. Buni jamoaning har bir a’zosi qalbidan his qilib turibdi va bu borada Toirov quyidagilarni aytdi:

“Yuqorida aytganimdek, bu biz uchun juda muhim o‘yin. Bu o‘z nomi bilan derbi. Derbiga biz tayyormiz. Maydonda ham jiddiy raqobat va muxlislar o‘rtasida ham shunday raqobat kechadi. Bu holat esa bizga qo‘shimcha kuch bag‘ishlaydi. Muxlislarimizni ushbu uchrashuvda kutib qolamiz. Xudo xohlasa, ishqibozlarimizni xursand qilamiz”.