Guliston shahrida voleybol bo‘yicha U-17 yosh qizlar, Navoiy shahrida o‘g‘il bolalar o‘rtasida o‘tkazilgan O‘zbekiston chempionati musobaqalari haqiqiy iste’dodlarni kashf etish asnosida g‘olib va sovrindor jamoalar nomini aniqlab berganligi bilan ahamiyatli bo‘ldi.
Navoiy va Sirdaryo viloyatlarida sakkiz kun davom etgan shiddatli va murosasiz o‘yinlar tomoshabinlarda katta qiziqish uyg‘otibgina qolmay, hududiy terma jamoa murabbiylari va O‘zbekiston voleybol federasiyasining seleksioner mutaxassislari uchun kelgusi rejalarni belgilab olish, jamoalarning texnik-taktik imkoniyatlarini tahlil etish, mamlakat milliy terma jamoasiga iqtidorli yoshlarni tanlash imkonini berdi.
Har ikki hududda o‘tgan mamlakat birinchiliklarida 14 ta jamoaning 200 dan oshiq sportchilari g‘oliblik uchun bahs olib borishdi.
Chempionatlarning yakuniy o‘yinlari sarhisobiga ko‘ra, qizlar o‘rtasida Namangan viloyati voleybolchilari mamlakat chempionligini qo‘lga kiritgan bo‘lsa, sovrinli o‘rinlar Qoraqalpog‘iston Respublikasi va Jizzax viloyati jamoalariga nasib etdi.
Navoiyda 17 yoshgacha bo‘lgan o‘g‘il bolalar jamoalari o‘rtasidagi o‘yinlarda mezbonlar – Navoiy viloyati jamoasi shohsupaning eng yuqorisidan joy egalladi. 2 va 3-o‘rinlar Qoraqalpog‘iston Respublikasi hamda Sirdaryo jamoalariga tegishli bo‘ldi.
Sirdaryo va Navoiy viloyati Ichki ishlar boshqarmasi rahbariyati O‘zbekiston chempionatlarning uyushqoqlikda tashkil etilishida, hududlardan kelgan jamoalarga yetarli shart-sharoitlar yaratilishida shaxsiy namuna ko‘rsatganligi e’tiborli bo‘ldi.
Chempionatlar yakunida g‘olib va sovrindorlar Sport vazirligi, O‘zbekiston voleybol federasiyasi va Sirdaryo viloyat hokimligi tomonidan medal, diplom va esdalik sovg‘alari bilan taqdirlandi.
