"Surxon" bosh murabbiyi Fevzi Davletov "Qizilqum"ga qarshi o‘yindan keyingi matbuot anjumanida jurnalistlarning savollariga javob berdi.

O‘yin haqida
— Birinchidan, barchani yangi mavsumning boshlanishi bilan tabriklayman. Afsuski, o‘tgan mavsumdagi kabi, biz yana mag‘lubiyat bilan boshladik. Xatolarimiz bo‘ldi, shu jumladan, o‘z darvozamizga gol o‘tkazishga sabab bo‘lganlari ham. Bu esa jamoaning shoshilishiga olib keldi. Biz imkoniyatlar yaratdik, penalti ham bo‘ldi, lekin gol ura olmadik.

Ikkinchi bo‘limda biz o‘yin taktikasiga o‘zgartirishlar kiritdik, lekin bizga kerakli natijaga erishish uchun biroz yetishmadi. Endi xatolarimizni o‘rganib, ushbu o‘yinni chuqur tahlil qilamiz

— Sizningcha, darvozabon Davron Merganovning o‘yini qanday bo‘ldi? Uning harakatlari haqida qanday fikrdasiz?
— Hozircha u jamoamizning asosiy darvozaboni. Murabbiylar shtabi qarori bilan uni ushbu o‘yinga tayyorladik. U maydonda bor kuchi bilan harakat qildi. Biz butun o‘yinni yozuvdan to‘liq ko‘rib chiqamiz va butun jamoaning o‘yinini tahlil qilamiz

— «Qizilqum» himoyada juda zich o‘ynadi va hujumkor futbolchilarimizga bo‘sh hudud qoldirmadi. Sizningcha, bu nima bilan bog‘liq?
— Aniqki, «Qizilqum» bizni o‘rganib chiqqan. Raqib bizga chiziqlar orasida bo‘sh hudud qoldirmadi. O‘ylashimcha, o‘yinning boshida o‘tkazib yuborilgan gol bizga salbiy ta’sir qildi. Ammo yana bir muhim lahza – bu penalti edi. Agar uni urganimizda, o‘yin boshqacha kechardi va biz muvozanatni tiklashga muvaffaq bo‘lardik. Ikkinchi bo‘limda o‘yinni nazorat qilishga harakat qildik, lekin bizda to‘pni himoyadan hujumga olib o‘tishda muammolar bo‘ldi.

— Ikkinchi bo‘limda maydonga tushgan hujumchi Abdug‘afur Haydarov o‘yinga juda tez moslashdi. U aslida asosiy tarkib futbolchisi emasmi?
— Biz ikkinchi bo‘limda o‘yinimizni kuchaytirishga qaror qildik. Shuni ham inobatga olish kerakki, Abdurahmonov kichik jarohat oldi. Haydarov harakat qildi, lekin darhol o‘yinga kira olmadi. Unga o‘yinning oxirgi daqiqalarida biroz kuch yetishmadi.