“Roma” Yevropa Ligasining 1/8 finalida “Atletik”ga imkoniyatni boy berib, musobaqani tark etdi. O‘yindan keyin jamoa hujumchisi Eldor Shomurodov jurnalistlarga intervyu berdi va mag‘lubiyat haqidagi fikrlari bilan o‘rtoqlashdi.

O‘zbekistonlik futbolchi Hummelsning qizil kartochka olgan vaziyatdagi xatosi uchun jamoa a’zolaridan uzr so‘ragani va “Roma”ning keyingi o‘yinlari haqida gapirdi.

"Hummels? Bu futbol, hamma xato qilishi mumkin. U o‘yindan keyin butun jamoadan uzr so‘radi. Jamoa Hummels uchun ham oxirigacha kurashdi. Birinchi bo‘lim oxirida gol o‘tkazib yuborish psixologik jihatdan juda og‘ir bo‘ldi deb o‘ylayman. 1:0 bo‘lib turganida ham bizda gol urish uchun imkoniyat bor edi, lekin 10 kishi bilan o‘ynash juda qiyin hisoblanadi.

Ikki kundan keyin “Kalyari”ga qarshi o‘yin o‘tkazamiz. Chempionlar Ligasiga chiqish uchun imkoniyatimiz bor va uni qo‘ldan boy bermaslik uchun endi bor e’tiborni ichki musobaqalarga qaratishimiz kerak", — dedi Shomurodov.