“Рома” Европа Лигасининг 1/8 финалида “Атлетик”га имкониятни бой бериб, мусобақани тарк этди. Ўйиндан кейин жамоа ҳужумчиси Элдор Шомуродов журналистларга интервью берди ва мағлубият ҳақидаги фикрлари билан ўртоқлашди.

Ўзбекистонлик футболчи Ҳуммелснинг қизил карточка олган вазиятдаги хатоси учун жамоа аъзоларидан узр сўрагани ва “Рома”нинг кейинги ўйинлари ҳақида гапирди.

"Ҳуммелс? Бу футбол, ҳамма хато қилиши мумкин. У ўйиндан кейин бутун жамоадан узр сўради. Жамоа Ҳуммелс учун ҳам охиригача курашди. Биринчи бўлим охирида гол ўтказиб юбориш психологик жиҳатдан жуда оғир бўлди деб ўйлайман. 1:0 бўлиб турганида ҳам бизда гол уриш учун имконият бор эди, лекин 10 киши билан ўйнаш жуда қийин ҳисобланади.

Икки кундан кейин “Кальяри”га қарши ўйин ўтказамиз. Чемпионлар Лигасига чиқиш учун имкониятимиз бор ва уни қўлдан бой бермаслик учун энди бор эътиборни ички мусобақаларга қаратишимиз керак", — деди Шомуродов.