Dubayning «Yunayted FK» vingeri Kvinsi Promes islomni qabul qildi. Ma’lumotlarga ko‘ra, niderlandiyalik futbolchi masjidda guvohlar huzurida shahodat kalimasini aytgan va Muhammad ismini olgan.
Promesga yaqin manbalarning aytishicha, futbolchi jinoiy ishlar tufayli hayoti izdan chiqib ketganini his qilib, hammasini o‘zgartirishga qaror qilgan. U yangi dinni qabul qilish haqidagi qarorini 2024 yil mart oyida Birlashgan Arab Amirliklarida Niderlandiya prokuraturasi talabi bilan hibsga olinganidan so‘ng qabul qilgan. U bu qadamni Moskva «Spartak» klubi bilan shartnomasi tugaganidan keyin qo‘ydi.
Promes haqida ma’lumotlar:
- «Spartak» safida 2014–2018 va 2021–2024 yillarda to‘p surgan.
- Amsterdam sudi uni 6 yilga ozodlikdan mahrum qilish haqida qaror chiqargan (giyohvand moddalar kontrabandasiga aloqadorlik ishi bo‘yicha).
- Shuningdek, amakivachchasiga pichoq bilan hujum qilgani uchun 1,5 yillik qamoq jazosi berilgan.
- Niderlandiya haligacha uni Birlashgan Arab Amirliklaridan ekstradisiya qilishga erisha olmagan.
