Дубайнинг «Юнайтед ФК» вингери Квинси Промес исломни қабул қилди. Маълумотларга кўра, нидерландиялик футболчи масжидда гувоҳлар ҳузурида шаҳодат калимасини айтган ва Муҳаммад исмини олган.
Промесга яқин манбаларнинг айтишича, футболчи жиноий ишлар туфайли ҳаёти издан чиқиб кетганини ҳис қилиб, ҳаммасини ўзгартиришга қарор қилган. У янги динни қабул қилиш ҳақидаги қарорини 2024 йил март ойида Бирлашган Араб Амирликларида Нидерландия прокуратураси талаби билан ҳибсга олинганидан сўнг қабул қилган. У бу қадамни Москва «Спартак» клуби билан шартномаси тугаганидан кейин қўйди.
Промес ҳақида маълумотлар:
- «Спартак» сафида 2014–2018 ва 2021–2024 йилларда тўп сурган.
- Амстердам суди уни 6 йилга озодликдан маҳрум қилиш ҳақида қарор чиқарган (гиёҳванд моддалар контрабандасига алоқадорлик иши бўйича).
- Шунингдек, амакиваччасига пичоқ билан ҳужум қилгани учун 1,5 йиллик қамоқ жазоси берилган.
- Нидерландия ҳалигача уни Бирлашган Араб Амирликларидан экстрадиция қилишга эриша олмаган.
