Xokkey bo‘yicha Qozog‘iston chempionati pley-off bosqichining yarim final bosqichidan o‘rin olgan «Humo» va «Torpedo» jamoalari o‘rtasidagi uchinchi o‘yin Toshkentda bo‘lib o‘tdi.

Uchrashuvning asosiy voqealari birinchi tanaffus arafasida sodir bo‘ldi. Danila Karaban va Vladislav Dyukarevning aniq zarbalari maydon egalariga hisobda oldinga chiqish imkonini berdi. Biroq, ko‘p o‘tmay Yan Tyutyunkov raqib darvozasini ishg‘ol qilib, bir shaybani qaytardi. Bu daqiqalarda "Humo" bir kishi kam bo‘lib o‘ynayotgan edi.

Navbatdagi gol o‘zini nisbatan uzoq vaqt kuttirdi. Ikkinchi bo‘limda darvozalarga shayba kiritilmagan bo‘lsa, uchinchi bo‘lim avvalida mezbonlar raqib darvozasini yana bir marta ishg‘ol qilishdi: Aleksandr Shevchenko ko‘pchilik ustunligidan foydalanib, jamoasi uchun uchinchi shaybani urdi.

O‘yin tugashiga 4 daqiqa qolganida Tyutyunkov dublini rasmiylashtirdi, ammo O‘skemen shahri jamoasi mag‘lubiyatdan qutulib qolishi uchun bu yetarli bo‘lmadi. Toshkentliklar darvozaboni Gleb Moiseev 29 ta zarbani qaytardi.  

Shu tariqa, "Humo" mazkur seriyada 2:1 hisobida oldinga o‘tib oldi. Jamoalar o‘rtasidagi to‘rtinchi o‘yin 22 mart kuni 17:00da "Humo arena"da boshlanadi.

Qozog‘iston chempionati, pley-off, yarim final, 3-o‘yin
«Humo» – «Torpedo» 3:2 (2:1, 0:0, 1:1)
Gollar:
1:0 – 14:05 – Karaban (Siksna, Lixotnikov)  
2:0 – 16:38 – Dyukarev (Lixotnikov, Karaban)  
2:1 – 18:49 – Tyutyunkov (Parxomenko, Markabayev) KG
3:1 – 43:06 – Shevchenko (Litovchenko, Malishev) KG
3:2 – 55:57 – Tyutyunkov (Skutar, Olendarenko)  

Seriyadagi hisob: «Torpedo» – «Humo» 1-2 (5:3, 2:4, 2:3)