Osiyoda 2026 yilgi Jahon chempionati saralash doirasidagi 7-tur uchrashuvlari yakunlandi. O‘zbekiston 20 mart, payshanba kuni Toshkentda Qirg‘izistonga qarshi maydonga tushib, 1:0 hisobida g‘alaba qozondi.

Bellashuvlardan keyin We Global Football portali milliy jamoalarning Amerika qit’asida bo‘ladigan mundialga yo‘llanma olish imkoniyatlarini baholadi.

Unga ko‘ra, O‘zbekiston milliy jamoasining A guruhidan okean ortidagi Jahon chempionatiga to‘g‘ridan-to‘g‘ri yo‘llanma olish imkoniyati 92,7 foizga baholanmoqda. Ya’ni guruhda 2-o‘rinni olish ehtimolimiz 86,6 foiz bo‘lsa, 1-o‘rinni egallash imkoniyatimiz 6,1 % deya baholangan. Hozirda Temur Kapadze boshchiligidagi jamoa Yaponiya, Eron va Janubiy Koreyadan keyin JCHga boradigan 4-jamoa sifatida ko‘rsatilmoqda.

A guruhida Eronning imkoniyatlari eng yuqori baholangan. 7-turdan keyin forslarning mundialga borish ehtimoli 100 foizga yetdi. O‘zbekiston esa 2-pog‘onani egallab, tarixda ilk marta dunyodagi eng nufuzli musobaqada qatnashishi taxmin qilingan. Birlashgan Arab Amirligi 7-turda Erondan uchralgan mag‘lubiyatdan keyin JCH yo‘llanmasiga ega chiqishi 6 foiz deb hisoblangan. Qatarda esa ushbu ko‘rsatkich 1,3 foiz deb taxmin qilingan. Guruh autsayderlari Qirg‘iziston va Shimoliy Koreyada 2026 yilgi JCHga borish ehtimoli 0 foiz.



AQSH, Meksika va Kanada maydonlarida o‘tadigan musobaqa uchun Osiyo qit’asiga 8,5 ta kvota ajratilgan. 3 ta guruhdagi 1 va 2-o‘rinlarni egallagan jamoalar to‘g‘ridan-to‘g‘ri yo‘llanma olsa, guruhlardagi 3—4-o‘rindagi jamoalar pley-offlar orqali qolgan 2,5 ta yo‘llanma uchun kurash olib boradi.

O‘zbekiston terma jamoasi 7-turdan keyin 16 ochko bilan A guruhida 2-o‘rinni egallab turibdi. Peshqadam Eron 19 ochkon qo‘lga kiritgan. BAA va Qatar 10 ochko bilan 3 va 4-o‘rinlardan joy olgan. Qirg‘iziston (3 ochko) va Shimoliy Koreya (2 ochko) so‘nggi pog‘onalarni band etgan.

Milliy jamoa keyingi uchrashuvni 25 mart kuni safarda Eronga qarshi o‘tkazadi. Bellashuv Toshkent vaqti bilan 21:00 da boshlanadi.