O‘zbekistonlik murabbiy Dmitriy An «Chempionat» nashriga bergan intervyusida milliy terma jamoaning 2026 yilgi Jahon chempionatiga chiqish imkoniyatlari haqida gapirdi.

"Saralash bosqichidagi navbatdagi g‘alabadan so‘ng O‘zbekistonning mundialga yo‘l olish imkoniyatlari oshdi. Hamma shuni kutyapti, bu mamlakat tarixidagi birinchi Jahon chempionati bo‘ladi. 25-mart kuni Eronga qarshi uchrashuvda jamoamizga muxlislik qilamiz. Qiyin bo‘ladi, ammo yigitlarda jangovor kayfiyat bor. U yerdan hech bo‘lmaganda bir ochko olib qaytishlari kerak — bu super natija bo‘ladi. O‘zbekistonda futbol yanada ommalashmoqda, o‘yinlarda stadionlar to‘lib-toshyapti. Muxlislar tomonidan katta qo‘llab-quvvatlash bor. Umid qilamizki, jahon chempionatiga yo‘l olamiz", — dedi An.  

Ayni paytda 2026 yilgi JCH uchun Osiyo saralash bosqichida O‘zbekiston terma jamoasi 16 ochko bilan guruhda ikkinchi o‘rinni egallab turibdi. Guruh peshqadami Eron terma jamoasining hisobida esa 19 ochko mavjud.