Oktagon ligasi menejeri Sultan Jakupov o‘zbek MMA jangchilari Odilxon Kamolov va Humoyun To‘xtamurodovni shaxsiy nizolarini professional jang orqali hal qilishga chaqirdi. Bu haqda Sportnews nashri xabar berdi.

Kamolov va To‘xtamurodov yengil vazn toifasida jang qiladi. Ularning tortishuvi 2022 yilda boshlangan, o‘shanda Odilxon bir tok-shouda Humoyunni jangga chaqirgan. Shundan so‘ng ko‘cha janjali vaqtida To‘xtamurodov Kamolovga tarsaki tushirgan. Shu vaqtdan beri ularning ehtimoliy jangi haqidagi gap-so‘zlar to‘xtamay kelmoqda. Odilxon vaqti-vaqti bilan Humoyun bilan jang qilish istagini bildirsa, To‘xtamurodov doimo o‘z hamyurti bilan oktagonga chiqishni istamasligini aytib kelgan.

Ko‘pchilik menga Odilxon Kamolov va Humoyun To‘xtamurodov o‘rtasidagi bahsli vaziyat haqidagi videolarni yubormoqda. Shaxsan o‘zimning fikrim shuki, ushbu sportchilar muammoni Octagon ligasida hal qilishi kerak. Agar ular istashsa, ushbu jangni Toshkentda o‘tkazishimiz mumkin. Agar Humoyun rozi bo‘lsa, Odilxon jang qilishga tayyor. Hozir vaziyat shunday rivojlanyaptiki, hammasini ko‘chada hal qilishmoqda. Lekin bu noto‘g‘ri, o‘zini hurmat qilgan sportchi bunday qilmaydi. Men yigitlarni ortiqcha bahslarni to‘xtatib, oktagonda jang qilib, bu masalani yopishga chaqiraman. Agar Humoyun rozi bo‘lsa, bu jang, albatta, bo‘lib o‘tadi, dedi Jakupov.

Eslatib o‘tamiz, Octagon ligasining may oyidagi turniri Toshkentda o‘tkazilishi rejalashtirilgan.