"Liverpul" markaziy himoyachisi va sardori Virjil van Deykning fikricha, "qizillar" Liga kubogi, Angliya kubogi va Chempionlar ligasini tark etganiga qaramay, mavsumni muvaffaqiyatli o‘tkazyapti.
"Mening fikrimcha, hozir biz uchun ishlar juda yaxshi ko‘rinmoqda. Mavsum boshida biz to‘rtta sovrin uchun kurashamiz deb hech kim kutmagandi, ammo ayni damda "Liverpul" liga chempionligi uchun kurashmoqda. Bu haqiqat. Menimcha, bu mavsum "Liverpul" uchun nihoyatda o‘ziga xos bo‘lishi ehtimoli katta", - deydi van Deyk.
"Liverpul" Angliya Premyer-ligasi turnir jadvalida birinchi o‘rinda bormoqda. Arne Slot jamoasi 30 ta o‘yindan keyin 73 ochko jamg‘argan va ikkinchi o‘rindagi “Arsenal”dan 12 ochko oldinda.
