O‘zbekiston U-17 terma jamoasi bosh murabbiyi Islom Ismoilov Xitoyga qarshi bahs oldidan o‘z fikrlarini bildirib o‘tdi.

"Oldimizda vaqt kam bo‘lgani sababli, tezkorlik bilan kechagi uchrashuvni tahlil qildik. Bugundan Xitoyga qarshi bahs uchun tayyorgarlikni boshladik. Xitoy yoshlar futboli ham Osiyoda o‘z o‘rniga ega. Oson o‘yin bo‘lmasligi aniq. Tayyorgarlikni shunga yarasha olib boryapmiz. Tailand bilan uchrashuvdagi xatolardan kelib chiqqan holda, yigitlarga kerakli ko‘rsatmalarni berib, taktik ishlanmalarni amalga oshirishga kirishdik.

2024 yil avgust oyida Xitoyda bo‘lib o‘tgan xalqaro turnirda mezbonlarga qarshi o‘ynaganmiz. Shu boisdan ushbu jamoaga qarshi qanday o‘yin ko‘rsatish bo‘yicha ozgina ma’lumotlarimiz bor. Bundan tashqari, raqibning Osiyo kubogi saralash bosqichi doirasidagi har bir uchrashuvi va o‘tkazgan o‘rtoqlik o‘yinlarini tahlil qilib, o‘zimiz uchun kerakli xulosaga keldik. Xudo xohlasa, guruhimizdagi ikkinchi bahsda ham g‘alaba qozonib, o‘zbek futboli muxlislarini xursand qilish uchun harakat qilamiz", — dedi Ismoilov.

O‘yin 6 aprel kuni Toshkent vaqti bilan soat 20:00da Toif shahridagi «Okaz» stadionida start oladi.