OAV xabarlariga ko‘ra, «Manchester Yunayted» «Brentford» jamoasida to‘p surayotgan kamerunlik hujumchi Brayan Mbeumo bilan shartnoma imzolashga qiziqish bildirmoqda.

«Qizil iblislar» rahbariyatining fikricha, bu futbolchi jamoa uchun «tezkor yechim» bo‘lishi va yangi loyihaga mukammal tarzda mos kelishi mumkin. Mbeumoning «Brentford» bilan amaldagi shartnomasi kelasi yili tugaydi, bu esa uning transferida narxni pasaytirish imkonini yaratadi.

Transfer summasining kamayish ehtimoli Mbeumoni yanada jozibador maqsadga aylantiradi. «Asalari»lar klubi ham yozda kamerunlik futbolchini jamoada qoldirish «qiyin vazifa» bo‘lishini tan olmoqda.

Joriy mavsumda Brayan Mbeumo «Brentford» safida 35 ta o‘yinda maydonga tushib, 16 ta gol urdi va 6 ta golli uzatma amalga oshirdi. Transfermarkt portali uning narxini 50 million yevroga baholamoqda.