O‘zbekiston voleybol federasiyasining navbatdan tashqari konferensiyasida ichki ishlar vaziri general-mayor Aziz Toshpo‘latov federasiya raisi etib saylandi. Bu haqda IIV matbuot xizmati xabar berdi.
Ma’lum qilinishicha, yig‘ilishda Aziz Toshpo‘latov nomzodi konferensiya ishtirokchilari tomonidan bir ovozdan ma’qullandi.
Shu bilan birga, federasiyaning Andijon, Buxoro, Namangan, Qashqadaryo, Surxondaryo, Sirdaryo, Xorazm va Toshkent shahrining hududiy bo‘limlari raisligiga nomzodlarni saylash taklif etildi.
Ushbu viloyatlar IIBlari boshliqlari va Toshkent shahar IIBB boshlig‘i bir ovozdan hududiy bo‘limlar raisligiga saylandi.
2025 yil yanvarida bosh prokuror Nig‘matilla Yo‘ldoshev O‘zbekiston sport kurashlari assosiasiyasi raisi etib saylangandi. Qurilish va uy-joy kommunal xo‘jaligi vaziri Sherzod Hidoyatov O‘zbekiston og‘ir atletika federasiyasiga rais bo‘ldi.
Bojxona qo‘mitasi raisi Akmalxo‘ja Mavlonov 17 fevral kuni Yengil atletika federasiyasi raisi etib saylangan edi.
“Paxtakor” FK prezidenti sifatida faoliyat yuritgan mutaxassis Botir Rahimov O‘zbekiston tennis federasiyasi raisi etib saylangani haqida xabar berilgandi.
