“Manchester Siti” klubi yozgi transfer oynasida jamoani tark etadigan Kevin De Bryuyne o‘rniga bir nechta nomzodlarni ko‘rib chiqmoqda. The Athletic nashri jurnalisti Devid Ornshteynning yozishicha, “shaharliklar” 25 yoshli “Nottingem Forest” futbolchisi Morgan Gibbz-Uayt va Leverkuzenning “Bayer” klubi 21 yoshli yarim himoyachisi Florian Virsga qiziqish bildirmoqda.

Manbaga ko‘ra, “Siti” belgiyalik yarim himoyachining o‘rnini tarkibdagi futbolchilar orqali ham to‘ldirishi mumkin. Xususan, Fil Foden jamoaning asosiy ijodkori rolini o‘z zimmasiga olishi ehtimoli bor. Ammo klub ustozi Pep Gvardiola de Bryuyne o‘rniga o‘rinbosar kerakligini ta’kidlagan.

Florian Virs joriy mavsum “Bayer” tarkibida 39 ta o‘yinda maydonga tushib, o‘z hisobiga 15 ta gol va 13 ta golli uzatmani yozdirib qo‘ygan. Gibbz-Uayt “Nottingem” safida 30 ta o‘yinda 5 ta gol kiritib, 9 ta assist muallifiga aylangan.

Ma’lumot uchun, Kevin de Bryuyne yozda jamoani tark etishi haqida rasman ma’lum qildi. Belgiyalik futbolchi “Siti”dagi 10 yillik faoliyati davomida 16 ta kubokni qo‘lga kiritgan. U jamoa safida 414 ta o‘yin o‘tkazib, 106 ta gol hamda 174 ta golli uzatma muallifiga aylangan.