“Манчестер Сити” клуби ёзги трансфер ойнасида жамоани тарк этадиган Кевин Де Брюйне ўрнига бир нечта номзодларни кўриб чиқмоқда. The Athletic нашри журналисти Девид Орнштейннинг ёзишича, “шаҳарликлар” 25 ёшли “Ноттингем Форест” футболчиси Морган Гиббз-Уайт ва Леверкузеннинг “Байер” клуби 21 ёшли ярим ҳимоячиси Флориан Вирцга қизиқиш билдирмоқда.

Манбага кўра, “Сити” белгиялик ярим ҳимоячининг ўрнини таркибдаги футболчилар орқали ҳам тўлдириши мумкин. Хусусан, Фил Фоден жамоанинг асосий ижодкори ролини ўз зиммасига олиши эҳтимоли бор. Аммо клуб устози Пеп Гвардиола де Брюйне ўрнига ўринбосар кераклигини таъкидлаган.

Флориан Вирц жорий мавсум “Байер” таркибида 39 та ўйинда майдонга тушиб, ўз ҳисобига 15 та гол ва 13 та голли узатмани ёздириб қўйган. Гиббз-Уайт “Ноттингем” сафида 30 та ўйинда 5 та гол киритиб, 9 та ассист муаллифига айланган.

Маълумот учун, Кевин де Брюйне ёзда жамоани тарк этиши ҳақида расман маълум қилди. Бельгиялик футболчи “Сити”даги 10 йиллик фаолияти давомида 16 та кубокни қўлга киритган. У жамоа сафида 414 та ўйин ўтказиб, 106 та гол ҳамда 174 та голли узатма муаллифига айланган.