"Roma" markaziy himoyachisi Mats Xummels faoliyatini yakunlaganiga qaramay, "Borussiya Dortmund"ga qaytishi mumkin.
Bu haqda Bulinews xabar bermoqda.
"Arilar" menisk yirtilgan va mavsumning qolgan qismida maydonga tusha olmaydigan markaziy himoyachi Niko Shlotterbekning o‘rniga o‘rinbosar qidirmoqda. Shu munosabat bilan 36 yoshli faxriyga klublar o‘rtasidagi jahon chempionati uchun himoya chizig‘ini mustahkamlash sifatida qaralmoqda.
Xummelsning italyan klubi bilan shartnomasi joriy mavsum oxirigacha amal qiladi va u uzaytirilmaydi.
Xummels faoliyatining katta qismini nemis futbolining ikki giganti - Dortmundning "Borussiya"si va "Bavariya" klublarida o‘tkazdi va ular bilan birga jami besh marta Bundesliga chempioni bo‘ldi. "Borussiya" bilan 2013 yilda Chempionlar ligasi finaliga qadar yetib borgan.
2010 yildan 2023 yilgacha Xummels Germaniya terma jamoasi safida 78 ta o‘yin o‘tkazib, 5 ta gol urdi va shu bilan 2014 yilgi jahon chempioniga aylandi. Himoyachi o‘tgan yozdan beri "Roma" safida o‘ynamoqda, barcha turnirlarda 19ta o‘yin o‘tkazib, 1ta gol urgan.
