Tuttosport xabariga ko‘ra, "Tottenxem" ayni damda "Yuventus"da ijarada o‘ynayotgan "Chelsi" himoyachisi Renatu Veyga xizmatiga qiziqish bildirgan. 21 yoshli portugaliyalik uchun londonliklardan tashqari "Brayton" ham da’vogarlik qilmoqda.

"Chelsi"da futbolchi deyarli o‘yin amaliyotiga ega bo‘lmadi, ammo A Seriyada ishonchli o‘yin namoyish etmoqda. Londonliklar uning transferi bo‘yicha taxminan 28 million yevrolik takliflarni ko‘rib chiqishga tayyor - garchi yanvar oyida u uchun 33 million so‘ragan bo‘lsa-da.

Futbolchi chap qanot himoyachisi sifatida ham, markaziy himoyachi sifatida ham harakat qilishi mumkin, bu esa uni "Tottenxem" yoki "Brayton" uchun universal variantga aylantiradi. Biroq, "Yuventus" ham portugaliyalikni mavsum yakunlangach sotib olish imkoniyatini istisno qilmayapti va hozirda italiyaliklar ehtimoliy bitim shartlarini o‘rganmoqda.

Qo‘shimcha qilamizki, Veyga bu mavsumda "Yuventus" safida barcha musobaqalarda 9 ta o‘yinda maydonga tushishga ulgurdi.