Rossiya Kubogi finali nafaqat «Zenit» va SSKA klublari o‘rtasidagi yuqori darajadagi to‘qnashuv, balki Qozog‘iston va O‘zbekistonning yetakchi futbolchilari o‘rtasidagi ramziy duelga aylanishi kutilmoqda. Finalda qozog‘istonlik himoyachi Nurali Alip («Zenit») va o‘zbekistonlik yarim himoyachi Abbosbek Fayzullayev (SSKA) maydonda to‘qnash keladi. Bu haqda sportarena.kz xabar berdi.

Ikki futbolchi ham jamoalarini finalga olib chiqishda muhim rol o‘ynadi va bu muvaffaqiyatlar ortidan Markaziy Osiyoning ikki istiqbolli vakillari butun mintaqa futbol muxlislarining diqqat markazida turibdi.

Finalga olib borgan yo‘l

16 aprel kuni bo‘lib o‘tgan yarim finallar natijasida «Zenit» va SSKA hal qiluvchi bosqichga yo‘l oldi.

«Zenit» ikki o‘yin natijasiga ko‘ra «Rostov»ni mag‘lub etdi — dastlabki o‘yin safarda 1:0 hisobida yakunlandi, javob bahsida esa peterburgliklar 2:0 hisobida ishonchli g‘alabaga erishdi. Umumiy hisob — 3:0.

SSKAning yo‘li unchalik oson kechmadi. Birinchi uchrashuvda armiyachilar Moskvadagi «Dinamo» ustidan 2:1 hisobida zafar quchishdi. Javob bahsida esa keskin kurash davom etdi va o‘yin 0:0 hisobida yakunlandi. Umumiy hisob — 2:1.

Alip va Fayzullayevning ishtiroki

Nurali Alip yarim finalning birinchi o‘yinida to‘liq 90 daqiqa maydonda harakat qildi. Ammo javob o‘yinida ishtirok etmadi — u Qozog‘iston terma jamoasiga qo‘shilgan edi. Bu terma jamoa uchun 2026 yilgi jahon chempionati saralash bosqichidagi hal qiluvchi bahslar edi.

Abbosbek Fayzullayev ham birinchi o‘yinda to‘liq harakat qildi, ammo ikkinchi o‘yinda murabbiylar qarorga ko‘ra ikkinchi bo‘lim boshida — 46-daqiqada almashtirildi.

Final sanalari

Rossiya Kubogi finali ikki bosqichda o‘tadi — 30 aprel va 14 may kunlari. Har ikki uchrashuv Toshkent vaqti bilan soat 17:00 da boshlanadi.