Россия Кубоги финали нафақат «Зенит» ва ЦСКА клублари ўртасидаги юқори даражадаги тўқнашув, балки Қозоғистон ва Ўзбекистоннинг етакчи футболчилари ўртасидаги рамзий дуэлга айланиши кутилмоқда. Финалда қозоғистонлик ҳимоячи Нурали Алип («Зенит») ва ўзбекистонлик ярим ҳимоячи Аббосбек Файзуллаев (ЦСКА) майдонда тўқнаш келади. Бу ҳақда sportarena.kz хабар берди.

Икки футболчи ҳам жамоаларини финалга олиб чиқишда муҳим роль ўйнади ва бу муваффақиятлар ортидан Марказий Осиёнинг икки истиқболли вакиллари бутун минтақа футбол мухлисларининг диққат марказида турибди.

Финалга олиб борган йўл

16 апрель куни бўлиб ўтган ярим финаллар натижасида «Зенит» ва ЦСКА ҳал қилувчи босқичга йўл олди.

«Зенит» икки ўйин натижасига кўра «Ростов»ни мағлуб этди — дастлабки ўйин сафарда 1:0 ҳисобида якунланди, жавоб баҳсида эса петербургликлар 2:0 ҳисобида ишончли ғалабага эришди. Умумий ҳисоб — 3:0.

ЦСКАнинг йўли унчалик осон кечмади. Биринчи учрашувда армиячилар Москвадаги «Динамо» устидан 2:1 ҳисобида зафар қучишди. Жавоб баҳсида эса кескин кураш давом этди ва ўйин 0:0 ҳисобида якунланди. Умумий ҳисоб — 2:1.

Алип ва Файзуллаевнинг иштироки

Нурали Алип ярим финалнинг биринчи ўйинида тўлиқ 90 дақиқа майдонда ҳаракат қилди. Аммо жавоб ўйинида иштирок этмади — у Қозоғистон терма жамоасига қўшилган эди. Бу терма жамоа учун 2026 йилги жаҳон чемпионати саралаш босқичидаги ҳал қилувчи баҳслар эди.

Аббосбек Файзуллаев ҳам биринчи ўйинда тўлиқ ҳаракат қилди, аммо иккинчи ўйинда мураббийлар қарорга кўра иккинчи бўлим бошида — 46-дақиқада алмаштирилди.

Финал саналари

Россия Кубоги финали икки босқичда ўтади — 30 апрель ва 14 май кунлари. Ҳар икки учрашув Тошкент вақти билан соат 17:00 да бошланади.