“Qizilqum” – “Qo‘qon-1912”  uchrashuvdan (1:0) keyingi matbuot anjumanida mezbonlar bosh murabbiyi Nikola Lazarevich bellashuv haqidagi fikrlari bilan o‘rtoqlashdi.

— Jamoamiz a’zolarini g‘alaba bilan tabriklayman. Shu bilan birga raqib jamoaga ham bugungi o‘yin uchun minnatdorchilik bildirmoqchiman. Biz “Qo‘qon-1912”dan aynan bugungidek o‘yin kutgandik. Raqibga qarshi jiddiy tayyorgarlik ko‘rgandik. Raqibning zaif nuqtalarini o‘rganib chiqib, aynan o‘sha hududlar  orqali hujum qilishni mashg‘ulotlarda sinovdan o‘tkazgandik. O‘ylashimcha,  rejamiz amalga oshdi. Ayniqsa, birinchi bo‘limda gol urish uchun ko‘plab imkoniyatlarga ega bo‘ldik. Ammo gol urishning uddasidan chiqa olmadik.

Ikkinchi bo‘limda esa bir kishi kam bo‘lib qolgan raqibga bosim uyushtirib, gol urishga muvaffaq bo‘ldik. Goldan keyin raqib oldinga o‘tishga majbur bo‘ldi va biz qarshi hujumda yana raqibni jazolashga urinib ko‘rdik. So‘nggi o‘n besh daqiqalikda jismoniy jihatdan raqibga tashabbusni berib qo‘ydik. Alenning kiritgan yagona goli g‘alabamiz uchun yetarli bo‘ldi. Albatta bugungi o‘yinni har tomonlama tahlil qilib, kerakli xulosalarni chiqaramiz.

— Ikki o‘yindan beri Lobjanidze maydonda ko‘rinmayapti, bugun Ilhom Vahobov uchrashuv qaydnomasidan o‘rin olmadi...

— Loboni ikki tur ilgari oyog‘idagi jarohati bezovta qilayotgandi. Shu sabab tavakkal qilishni istamadik. Shifokorimiz bilan maslahatlashib, u kichik jarohatidan to‘liq forig‘ bo‘lishi uchun imkoniyat yaratib berdik. Muxlislar keyingi turda uni maydonda ko‘rishadi.  Vahobov “Bunyodkor”ga qarshi kechgan og‘ir bellashuvdan keyin o‘zini noqulay his qilayotgandi. 2-3 kundan keyin u to‘liq safga qaytib, mashg‘ulotlarda ishtirok eta boshlaydi.