O‘zbekistonning "Qizilqum" klubi 25 yoshli hujumchisi Roman Papariga Sports.ua nashriga bergan intervyusida Angliyaning "Manchester Siti" klubi va O‘zbekiston terma jamoasi himoyachisi Abduqodir Husanov haqidagi xotiralari bilan o‘rtoqlashdi.

— Husanov haqida nimalarni eslay olasiz?  
— Hayotda juda odobli, maydonda esa haqiqiy professional. Men uni yuqori darajadagi futbolchi, deb hisoblayman. Men "Energetik-BGU"ga kelgan paytimda Husanov allaqachon u yerda edi. Maydondagi harakatlari bilan meni hayratga solgan edi. U o‘sha vaqtdayoq katta maqsadlarga ega edi. Mashg‘ulotlarda doimo 100% kuch bilan harakat qilardi.

— Maksim Shaskixning o‘yinlarini ko‘rganmisiz?  
— Uning "Dinamo"dagi buyuk faoliyati haqida faqat raqamlar orqali bilaman. Chunki o‘sha paytlar men hali yosh edim. Ammo u Kiyevning "Arsenal" klubida o‘ynaganida, maydon tashqarisida unga to‘p uzatganimni eslayman.

Papariga Ukrainadagi faoliyatini ham eslab o‘tdi:  

"Futbolga men Schastlivoye qishlog‘idagi bolalar-o‘smirlar sport maktabi orqali kelganman. Keyin 5 yil davomida "Munkach" klubining yoshlar jamoasida o‘ynadim. 2017 yili Vengriyaning "Kishvarda" klubiga o‘tganman".  

Keyinchalik Ukrainaga qaytib, Raxovning "Karpati" jamoasida o‘ynagan. 2019 yilning yozida Slovakiyaning "Rimavska-Sobota" klubida to‘p surgan va 2020 yil mart oyigacha u yerda o‘ynagan. Keyin koronavirus pandemiyasi boshlangan.

Pandemiya tufayli u Slovakiyaga qayta olmagan. "O‘sha paytda faoliyatimni tugatish haqida o‘ylab ham qolgandim. Ammo bir kuni jiyanimni "Munkach" futbol maktabiga olib borganimda, klub direktori bilan uchrashib qoldim. U klub oldiga katta maqsadlar qo‘yilganini aytdi. Shunda menda yangi kuch paydo bo‘ldi va sobiq jamoamga qaytib, faoliyatimni davom ettirishga qaror qildim", — dedi Papariga.

Abduqodir Husanov va Maksim Shaskixga kelsak, hozir Abduqodir Angliyaning "Manchester Siti" klubida to‘p surmoqda, Maksim Aleksandrovich esa — Ukraina Premyer-ligasi tarixidagi eng yaxshi to‘purar — O‘zbekistonning "Paxtakor" klubida murabbiylik qilmoqda.