Ўзбекистоннинг "Қизилқум" клуби 25 ёшли ҳужумчиси Роман Папарига Sports.ua нашрига берган интервьюсида Англиянинг "Манчестер Сити" клуби ва Ўзбекистон терма жамоаси ҳимоячиси Абдуқодир Ҳусанов ҳақидаги хотиралари билан ўртоқлашди.

— Ҳусанов ҳақида нималарни эслай оласиз?  
— Ҳаётда жуда одобли, майдонда эса ҳақиқий профессионал. Мен уни юқори даражадаги футболчи, деб ҳисоблайман. Мен "Энергетик-БГУ"га келган пайтимда Ҳусанов аллақачон у ерда эди. Майдондаги ҳаракатлари билан мени ҳайратга солган эди. У ўша вақтдаёқ катта мақсадларга эга эди. Машғулотларда доимо 100% куч билан ҳаракат қиларди.

— Максим Шацкихнинг ўйинларини кўрганмисиз?  
— Унинг "Динамо"даги буюк фаолияти ҳақида фақат рақамлар орқали биламан. Чунки ўша пайтлар мен ҳали ёш эдим. Аммо у Киевнинг "Арсенал" клубида ўйнаганида, майдон ташқарисида унга тўп узатганимни эслайман.

Папарига Украинадаги фаолиятини ҳам эслаб ўтди:  

"Футболга мен Счастливое қишлоғидаги болалар-ўсмирлар спорт мактаби орқали келганман. Кейин 5 йил давомида "Мункач" клубининг ёшлар жамоасида ўйнадим. 2017 йили Венгриянинг "Кишварда" клубига ўтганман".  

Кейинчалик Украинага қайтиб, Раховнинг "Карпати" жамоасида ўйнаган. 2019 йилнинг ёзида Словакиянинг "Римавска-Собота" клубида тўп сурган ва 2020 йил март ойигача у ерда ўйнаган. Кейин коронавирус пандемияси бошланган.

Пандемия туфайли у Словакияга қайта олмаган. "Ўша пайтда фаолиятимни тугатиш ҳақида ўйлаб ҳам қолгандим. Аммо бир куни жиянимни "Мункач" футбол мактабига олиб борганимда, клуб директори билан учрашиб қолдим. У клуб олдига катта мақсадлар қўйилганини айтди. Шунда менда янги куч пайдо бўлди ва собиқ жамоамга қайтиб, фаолиятимни давом эттиришга қарор қилдим", — деди Папарига.

Абдуқодир Ҳусанов ва Максим Шацкихга келсак, ҳозир Абдуқодир Англиянинг "Манчестер Сити" клубида тўп сурмоқда, Максим Александрович эса — Украина Премьер-лигаси тарихидаги энг яхши тўпурар — Ўзбекистоннинг "Пахтакор" клубида мураббийлик қилмоқда.