Davlatimiz rahbari tomonidan 2025 yil 30 yanvarda imzolangan “O‘zbekiston – 2030” strategiyasi “Atrof-muhitni asrash va “yashil iqtisodiyot” yilida amalga oshirishga oid davlat dasturi to‘g‘risida”gi farmonda har bir insonga o‘z salohiyatini ro‘yobga chiqarish uchun munosib sharoitlar yaratish nazarda tutilgan.
Mazkur hujjat ijrosini ta’minlash bo‘yicha ishlab chiqilgan rejaga muvofiq, mamlakatimizda istiqomat qilayotgan 7 yoshdan 70 yoshgacha va undan katta yoshli insonlardan “Jismoniy tayyorgarlik darajasi” sport sinovlarini qabul qilish belgilangan.
Aholi salomatligini mustahkamlash asnosida yurtimizda sog‘lom turmush tarzi targ‘ibotini kuchaytirishda “Jismoniy tayyorgarlik darajasi” sport sinovlarining ahamiyati beqiyos. Ishlab chiqilgan dasturga binoan joriy yilning aprel-may oylarida 7-17 yoshdagi umumta’lim maktablari o‘quvchilaridan sport sinovlari qabul qilinadi.
Shu kunlarda mamlakatimiz bo‘ylab maktab o‘quvchilaridan sport sinovlarini qabul qilish jarayonlari qizg‘in davom etmoqda.
Joriy yilning 19 aprelidan maktab o‘quvchilari o‘rtasida boshlangan sport sinovlari natijasida bugungacha 5 milliondan ortiq navqiron avlod vakillari “Jismoniy tayyorgarlik darajasi” bilan qamrab olindi.
Kuni kecha poytaxtimizning Yunusobod, Mirzo Ulug‘bek, Chilonzor, Yashnobod kabi tuman maktablarida o‘quvchilardan sport sinovlarini qabul qilish ishlari boshlandi. Haqiqiy salomatlik bayrami shaklida tashkil etilgan tadbirning ochilish marosimlarida ishtirok etgan Sport vazirligi, Milliy olimpiya qo‘mitasi, Toshkent shahar hokimligi va boshqa tashkilot mutasaddilari “Jismoniy tayyorgarlik darajasi”ni aholi orasida, ayniqsa, yoshlar o‘rtasida tizimli tarzda o‘tkazish xalq salomatligini oshirish, millat genofondini sog‘lomlashtirish, jamiyatda sog‘lom muhitni vujudga keltirishga xizmat qilishi bilan ahamiyatli ekanini ta’kidladi.
Sport sinovlarini qabul qilishda maktablarda tahsil olayotgan o‘quvchilarning ishtiroki, qamrab olinganlik darajasini aniqlash reytingi yuritiladiki, bu, hududlarda jismoniy tarbiya va sportga berilayotgan e’tiborning qay darajada ekanligini aniqlash mezonlarini ham belgilab beradi. Baholash tizimiga ko‘ra, sport sinovlarining maxsus talablarini muvaffaqiyatli bajargan o‘quvchilar maxsus imtiyozlarga ega bo‘ladi. Tegishli tartibda rag‘batlantiriladi. 10-11 sinf o‘quvchilari “Vatan tayanchi” harbiy otryadlariga qabul qilinadi.
Shuningdek, sinovlarni muvaffaqiyatli topshirgan iste’dodli yoshlar orasidan sport zaxirasi shakllantiriladi. Qobiliyatiga qarab sport maktablariga yo‘naltiriladi.
Yana bir e’tiborga molik jihat, “Jismoniy tayyorgarlik darajasi”ni bajargan yoshlar xohishiga ko‘ra “Temurbeklar maktabi”ga test sinovlarisiz o‘qishga kirishda imtiyozga ega bo‘ladi.
