Kataloniyaning "Barselona" klubida jamoaning 17 yoshli vingeri Lamin Yamal tufayli keskin muhit yuzaga kelmoqda. Bu haqda El Nacional jurnalistlari xabar bermoqda.
Manbaning yozishicha, bu yil yozda yulduz futbolchi 18 yoshga to‘ladi. Shundan so‘ng uning "ko‘k-anorranglilar" bilan tuzgan professional shartnomasi kuchga kiradi. Kelishuv shartlariga ko‘ra, uning maoshi bir mavsum uchun 35 milliondan 40 million yevrogacha bo‘lishi mumkin. Lamin yoshligida jamoaning eng ko‘p maosh oluvchi futbolchisiga aylanadi. "Barselona"ning tajribaliroq futbolchilari bu omildan norozi. Ularning fikricha, Yamal 18 yoshida klubda eng katta maosh olmasligi kerak.
La Liganing joriy mavsumida 17 yoshli ispaniyalik 30 ta o‘yinda maydonga tushib, 6 ta gol urdi va 12 ta golli uzatmani amalga oshirdi.
