Afg‘oniston hukumati mamlakatda shaxmat sport turini rasman taqiqladi. “Tolibon” bu o‘yinni man etib, mamlakat shaxmat federasiyasini yopishga qaror qildi. Bu haqda “Sports.ru” nashri xabar berdi.

Unga ko‘ra, mazkur farmonni Afg‘oniston amiri shaxsan imzolagan, tashabbus esa Ezgu ishlarni targ‘ib qilish va yovuzlikning oldini olish vazirligi tomonidan ilgari surilgan.

9 may kuni afg‘onistonlik shaxmatchilar mamlakatdagi Sport va jismoniy tarbiya bo‘yicha departamentga murojaat qilib, shaxmat o‘ynashga ruxsat berishni, shuningdek, to‘garaklar va musobaqalar tashkil etish uchun moliyaviy yordam ajratishni so‘rashdi. Biroq “Tolibon” hokimiyati tomonidan tuzilgan departament vakillari bu sport turi amir farmoni bilan “harom” deb topilgani va Afg‘oniston shaxmat federasiyasi faoliyati butunlay to‘xtatilganini ma’lum qildi.

Ma’lumot uchun, Afg‘oniston shaxmat federasiyasi “Tolibon” hokimiyatga qayta kelganidan keyin ham faoliyat olib borayotgan edi. Federasiya nafaqat erkaklar, balki ayollarni ham o‘qitib kelayotgan, shuningdek, mamlakat bo‘ylab turli musobaqalar tashkil etayotgan edi.

Bugungi kunda dunyoning aksariyat davlatlarida shaxmat intellektual sport turi sifatida e’tirof etilgan bo‘lsa-da, “Tolibon” boshqaruvidagi Afg‘onistonda bu o‘yin qiyinchiliklarga duch kelmoqda.

Ta’kidlash kerakki, bu Afg‘onistonda shaxmat ilk bor taqiqlanishi emas. 1996–2001 yillardagi avvalgi “Tolibon” boshqaruvi davrida ham nafaqat shaxmat, balki boshqa ko‘ngilochar mashg‘ulotlar – musiqa, televideniye va internet ham taqiqlangandi. O‘sha paytda bu faoliyatlar diniy majburiyatlardan chalg‘itadi va qimorbozlikni rivojlantiradi, deb hisoblangan.

Avvalroq asli afg‘onistonlik bo‘lgan UFC jangchisi Ahmad Hasanzoda jinsiy zo‘ravonlikda ayblanib, qamoqqa olingani haqida xabar tarqalgan edi.