Madridning «Real» jamoasi darvozaboni, belgiyalik Tibo Kurtua «qaymoqranglilar» bilan mehnat shartnomasini uzaytirishga yaqin. Bu haqda insayder Nikolo Skira ijtimoiy tarmoq "X" orqali xabar berdi.

Manbaning ma’lum qilishicha, Kurtua va ispaniyalik klub 2027 yilgacha shartnomani uzaytirish arafasida turibdi. Hozirgi shartnoma 2026 yil 30 iyunigacha amal qiladi.

Joriy mavsumda Kurtua «Real» safida barcha musobaqalarda 44 ta o‘yin o‘tkazib, 50 ta gol o‘tkazib yubordi va 14 ta o‘yinni «quruq» yakunladi. Transfermarkt portali ma’lumotiga ko‘ra, 33 yoshli futbolchining bozor qiymati 25 million yevroni tashkil etadi.

34 ta o‘yindan so‘ng «Real» La Liga jadvalida 75 ochko bilan ikkinchi o‘rinni egallab turibdi. 35-turda Karlo Anchelotti shogirdlari Kataloniyaning «Barselona» jamoasiga qarshi maydonga tushadi. Uchrashuv yakshanba, 11 may kuni, Toshkent vaqti bilan 19:15 da boshlanadi.