«Chelsi» kelasi mavsumda Yevropaning qaysi musobaqasida ishtirok etishni tanlash huquqini qo‘lga kiritishi mumkin, deb xabar bermoqda ESPN.

Agar londonliklar Angliya Premyer-ligasida Chempionlar Ligasi yo‘llanmasini beradigan o‘rinni egallab, shu bilan birga Konferensiyalar Ligasi finalida «Betis»ni mag‘lub etsa, UYEFA klubga tanlash huquqini beradi. Chunki Konferensiyalar Ligasidagi g‘alaba jamoaga kelasi mavsum Yevropa Ligasida ishtirok etish kafolatini beradi. Bunday holatda, «Chelsi» kelasi mavsumda Chempionlar Ligasi yoki Yevropa Ligasi o‘rtasida tanlov qilish imkoniyatiga ega bo‘ladi.

Qayd etilishicha, bu qoida avvalroq reytingda past o‘rinlarda turgan chempionatlar jamoalari uchun joriy etilgan. Ular Konferensiyalar Ligasida g‘alaba qozonib, mahalliy chempionatda ham g‘olib chiqishlari mumkin. Agar bunday klub Chempionlar Ligasi saralashidan o‘tish qiyin deb hisoblasa, Konferensiyalar Ligasidagi g‘alaba orqali Yevropa Ligasiga to‘g‘ridan-to‘g‘ri yo‘llanma olishi mumkin.

Chempionlar Ligasiga chiqish uchun «Chelsi» Premyer-ligada birinchi beshlikka kirishi lozim. Chempionat nihoyasiga ikki tur qolgan paytda, «ko‘klar» beshinchi o‘rinda borishmoqda va bu borada «Aston Villa»ni qo‘shimcha ko‘rsatkichlar hisobidan ortda qoldirishmoqda.