«Челси» келаси мавсумда Европанинг қайси мусобақасида иштирок этишни танлаш ҳуқуқини қўлга киритиши мумкин, деб хабар бермоқда ESPN.

Агар лондонликлар Англия Премьер-лигасида Чемпионлар Лигаси йўлланмасини берадиган ўринни эгаллаб, шу билан бирга Конференциялар Лигаси финалида «Бетис»ни мағлуб этса, УЕФА клубга танлаш ҳуқуқини беради. Чунки Конференциялар Лигасидаги ғалаба жамоага келаси мавсум Европа Лигасида иштирок этиш кафолатини беради. Бундай ҳолатда, «Челси» келаси мавсумда Чемпионлар Лигаси ёки Европа Лигаси ўртасида танлов қилиш имкониятига эга бўлади.

Қайд этилишича, бу қоида аввалроқ рейтингда паст ўринларда турган чемпионатлар жамоалари учун жорий этилган. Улар Конференциялар Лигасида ғалаба қозониб, маҳаллий чемпионатда ҳам ғолиб чиқишлари мумкин. Агар бундай клуб Чемпионлар Лигаси саралашидан ўтиш қийин деб ҳисобласа, Конференциялар Лигасидаги ғалаба орқали Европа Лигасига тўғридан-тўғри йўлланма олиши мумкин.

Чемпионлар Лигасига чиқиш учун «Челси» Премьер-лигада биринчи бешликка кириши лозим. Чемпионат ниҳоясига икки тур қолган пайтда, «кўклар» бешинчи ўринда боришмоқда ва бу борада «Астон Вилла»ни қўшимча кўрсаткичлар ҳисобидан ортда қолдиришмоқда.