Splitning "Xayduk" klubi 37 yoshli yarim himoyachisi Ivan Rakitich futbolchilik faoliyatini yakunlashga qaror qildi. Bu haqdagi ma’lumotlar Xorvatiya ommaviy axborot vositalarida, xususan, Jutarnji.hr saytida paydo bo‘ldi.
Rakitich professional darajadagi so‘nggi o‘yinini 24 may kuni "Shibenik"ga qarshi o‘tkazishi aytilmoqda. Yakshanba kuni "Riyeka"ga qarshi kechgan o‘yinda Rakitich ikkinchi bo‘limda zaxiraga olindi va u o‘rindiqqa o‘tirar ekan, ko‘z yoshlarini tiya olmadi.
Rakitich faoliyati davomida Ispaniyaning "Sevilya" va "Barselona" klublari hamda Xorvatiya terma jamoasi yarim himoyachisi sifatida shuhrat qozongan. Ivan "Xayduk"ga 2024 yilda, joriy mavsum boshlanishidan oldin kelgan.













