Angliya Premyer-Ligasi 37-turi doirasida "Liverpul" "Brayton"ga mag‘lub bo‘ldi (2:3). Shu tariqa, "qizillar" muddatidan avval chempionlikni rasmiylashtirgan klublar orasida APL antirekordini qayd etdi. Bu haqda Opta Sport xabar bermoqda.
Manbaga ko‘ra, "Liverpul" muddatidan avval rasmiylashtirilgan chempionlikdan so‘ng Angliya chempionatining uchta o‘yinida ham g‘alaba qozona olmagan ligadagi birinchi jamoaga aylandi. Avvalroq mersisaydliklar "Arsenal" bilan durang o‘ynagan (2:2), shuningdek, "Chelsi"ga qarshi bahsda mag‘lubiyatga uchragandi (1:3).
Eslatib o‘tamiz, APLning so‘nggi turidan oldin "Liverpul" hisobida 83 ochko bor. Ikkinchi o‘rindagi "Arsenal" hisobidagi ochkolar soni 71 taga yetdi. Keyingi uchrashuvda Arne Slot shogirdlari o‘z maydonida "Kristal Pelas"ni qabul qiladi.
