Hujumchi Lautaro Martines va yarim himoyachi Davide Frattezi Milanning "Inter" jamoasining navbatdagi o‘yinida ishtirok etishi mumkin.

Juma kuni "neradzurrilar" A Seriya so‘nggi turida "Komo"ga qarshi o‘ynaydi - "Napoli" mag‘lub bo‘lib, "Inter" g‘alaba qozonsa, Simone Indzagi jamoasi Skudettoni qo‘lga kiritadi. Sky Sport xabariga ko‘ra, chorshanba kuni Martines va Frattezi umumiy guruhda qisman yuklama bilan mashg‘ulot o‘tkazdi. Ikkalasi ham chempionlik uchun bahsda maydonga tushishi mumkin, ammo asosiy tarkibda emas. Eslatib o‘tamiz, hujumchi va xavbek jarohat tufayli avvalgi ikki uchrashuvda maydonga tusha olmagan edi.

31 may kuni "Inter" Chempionlar Ligasi finalida "PSJ"ga qarshi maydonga tushadi. Uchrashuv Myunxenda bo‘lib o‘tadi.