Ayni paytda butun dunyodagi ko‘plab musulmonlar qatorida o‘zbekistonlik ziyoratchilar ham Arafot tog‘ida haj amallarini bajarishmoqda. Bugun haj ziyorati chog‘ida muftiy Nuriddin Xoliqnazarov boshchiligidagi o‘zbekistonlik ziyoratchilar futbol bo‘yicha milliy terma jamoa g‘alabasi haqqiga duo qilishdi.

"Bu shunchaki o‘yin emas. Bu yerda vatan sharafi turibdi, yurt obro‘si turibdi. Ular bizdan duo umidida turishibdi. Futbol jamoamizga Alloh taoloning O‘zi madadkor bo‘lsin. Ilohim, yurtimizni sha’nini butun dunyoga tarasinlar. Alloh ularga kuch-quvvat bersin. Har bir qadamlarini Alloh o‘tkir qilsin. Butun dunyoga bizni tanitishlikda Alloh madadkor bo‘lsin. Ularni yomonliklardan, kasalliklardan, yomon ko‘zlardan Allohning O‘zi saqlab, O‘zi himoya qilib tursin. Allohim mana shu hojilarning duolari hurmatidan ularga g‘alaba ato qilsin", deb duo qildi muftiy Nuriddin Xoliqnazarov.

Futbol bo‘yicha O‘zbekiston milliy terma jamoasi jahon chempionati yo‘lida bugun 5 iyun kuni Abu-Dabi shahrida BAA terma jamoasiga qarshi maydonga tushadi. O‘yindagi g‘alaba yoki har qanday hisobdagi durang O‘zbekiston milliy terma jamoasiga 2026 yili AQSH, Kanada va Meksikada bo‘lib o‘tadigan jahon chempionatiga to‘g‘ridan-to‘g‘ri yo‘llanmani taqdim qiladi.