O‘zbekiston Superligasi 4-turidan qoldirilgan uchrashuvda “Xorazm” jamoasi safarda “Qizilqum” ustidan ishonchli g‘alabaga erishdi. Navoiydagi “Yoshlik” stadionida bo‘lib o‘tgan bahsda urganchliklar raqib darvozasiga javobsiz uchta gol urib, 3:0 hisobida zafar quchdi.

Hisob 11-daqiqada ochildi — Humoyunmirzo Iminov aniq zarba bilan “Xorazm”ni oldinga olib chiqdi. 41-daqiqada Murod Bobojonov farqni ikki baravarga oshirdi.

Ikkinchi bo‘lim ham keskin kurashlar ostida o‘tdi. Har ikki jamoa hujumkor o‘yin namoyish etdi. 75-daqiqada “Qizilqum” futbolchisi Jaba Jigauri qizil kartochka olib, jamoasini maydonda bir kishi kam holatda qoldirdi.

Ushbu ustunlikni yaxshi foydalangan “Xorazm” 90+2-daqiqada uchinchi golini kiritdi. Hazrat Tursunqulov yakuniy nuqtani qo‘yib, jamoasining yirik hisobdagi g‘alabasini ta’minladi.

Mazkur natijadan so‘ng “Xorazm” ochkolarini 14 taga yetkazib, turnir jadvalida 4 pog‘ona yuqorilab 8-o‘ringa ko‘tarildi. 11 ochkoga ega “Qizilqum” esa 11-o‘rinda qolmoqda.

O‘zbekiston Superligasi

4-tur (qoldirilgan bahs)

6 iyun, juma

“Qizilqum” — “Xorazm” 0:3

Gollar: 0:1 — Iminov (11), 0:2 — Bobojonov (41), 0:3 — Tursunqulov (90+2).