Braziliya terma jamoasi bosh murabbiyi Karlo Anchelotti "Barselona" vingeri Rafinya haqidagi savolga javob berdi.
28 yoshli futbolchi italiyalik murabbiy qo‘l ostida Ekvadorga qarshi (0:0) "Selesao"ning debyut uchrashuvini diskvalifikasiya tufayli o‘tkazib yubordi. Paragvay bilan bo‘ladigan o‘yinda esa u maydonga tushadi.
"Rafinyaning qaytishi biz uchun ajoyib yangilik. Bu mavsumda u o‘zini dunyoning eng yaxshi futbolchilaridan biri sifatida ko‘rsatdi. Biz yaxshi o‘yin ko‘rsatishimiz va u tez-tez raqib darvozasi oldida turishi uchun hamma narsani qilishimiz kerak", - dedi Anchelotti matbuot anjumanida.
Braziliya - Paragvay o‘yini 11 iyun kuni bo‘lib o‘tadi.
