Myunxenning «Bavariya» jamoasi vingeri Leroy Sane «Galatasaroy»ga o‘tish bo‘yicha muzokaralarni yakunlash uchun Istanbulga yetib keldi va turk klubining rasmiy televideniyesiga dastlabki izohlarini berdi.

«Bu yerdagi atmosfera menga juda katta taassurot qoldirdi. Stadionda juda shovqinli muhit bor edi. Albatta, bu mening qarorimga katta ta’sir ko‘rsatdi. Men “Galatasaroy” muxlislari oldidagi ilk o‘yinimni intiqlik bilan kutyapman.

Albatta, menda ko‘plab takliflar bor edi, lekin aynan “Galatasaroy” menda eng iliq taassurot qoldirdi. Atmosfera, klubning nufuzi, meni olishga bo‘lgan ishtiyoqlari, menga bo‘lgan qiziqishlari — bularning barchasi mening qarorimga ta’sir qildi. Shuning uchun ishonch bilan “Galatasaroy”ga o‘tish qarorini qabul qildim. Bizga bunday imkoniyat yaratgani uchun prezidentimiz Dursun O‘zbekka, bosh murabbiy Okan Burukka va janob Abdulloh Kavukju (Galatasaroyning bosh direktori — tahr.)ga o‘z minnatdorchiligimni bildiraman», — deb Sanening so‘zlarini keltiradi «Galatasaroy»ning rasmiy sayti.

Avvalroq xabar qilinganidek, Sane Turkiya chempionlari bilan 2028 yil yozigacha mo‘ljallangan shartnoma imzolaydi. Futbolchi 2025 yilda AQSHda bo‘lib o‘tadigan Klublar o‘rtasidagi Jahon chempionati boshlanishidan oldin hozirgi jamoasini tark etadi. Eslatib o‘tamiz, Sanening «Bavariya» bilan amaldagi shartnomasi 2025 yil iyunida tugaydi.