O‘FA hakamlar faoliyatini yanada rivojlantirish, ularning professional darajasini oshirishga qaratilgan chora-tadbirlarni davom ettirmoqda.
O‘zbekiston futbol assosiasiyasida hakamlar uchun Italiyaning mashhur «Macron» brendi ostidagi yangi ekipirovkalar taqdimoti o‘tkazildi. Mutaxassislar mazkur brendning sifati va qulayliklarini yuqori baholab kelishmoqda. Endilikda mamlakatimizning barcha referilar jamoasi Superliga, Proliga, Birinchi liga, Ayollar Oliy ligasi uchrashuvlari, shuningdek, O‘zbekiston kubogi va mintaqaviy turnirlarda aynan ushbu yangi liboslarda maydonga chiqishadi.
FIFA prezidenti Janni Infantino futbol hakamlarini maydondagi birinchi jamoa, deb ta’kidlashi bejiz emas, chunki futbolning sifatli rivojlanishi va o‘sishida professional hakamlar muhim o‘rin tutadi. Hakamlik tizimini zamonaviy usullar bilan rivojlantirish biz uchun ham ustuvor yo‘nalish hisoblanadi. Bugun taqdim etilayotgan ekipirovkalar — bu yo‘ldagi muhim qadamlarimizdan biridir, dedi O‘FA birinchi vise-prezidenti Ravshan Irmatov.













